致Nerdy Vet Nurse的感謝信：

（利申我不是媒）

初接觸到Nerdy的時候感覺很猶豫，一黎唔知個課程質素係點，二黎係做獸醫護士時間不算長，擔心自己聽唔明究竟講緊d乜，又驚比同行笑自己連d好basic既野都唔識。

直到去第一次上堂，內心所有的不安全部煙消雲散～

首先課程設計得真係好好好好好好好好好好，英文筆記及配圖加上粵語講解，想唔明都好難。

成個過程唔似以前返學果種好沉悶跟住要塞曬d野入個腦咁，Jan的講解技巧同埋佢本身既知識水平十分之高超。

第二係無知並不可恥，無知而不自知才是可怕。課堂上遇到的同行背景很不同，有來自大小規模不同的機構，亦有年資尚淺和一些一睇就知係Senior既姑娘，每個問題的考量和出發點都會有偏差，Nerdy呢度提供到一個舒適的平台讓大家可以愉快（為所欲為）的交流，真係好耐心咁樣去分析或者去做資料搜集務求有一個切實的答案。

上網的確有好多唔同既網站提供到醫療上的資訊，但從來都沒有以粵語簡單易明的資料整合。

即使未報名上堂都好，睇下Blog或者係Instagram既post都獲益匪淺，可以感受到Jan用了很多時間及心思去設計每一篇文，每一個post，真真切切的以一個獸醫護士的角度去分析及匯報。

作為一個獸醫護士，真係唔係只是中意動物就可以做得到，所以我都好敬佩Jan可以有勇氣及毅力成立Nerdy Vet Nurse呢個機構。係香港，入行真係唔難，初初白紙一張既時候好多知識或者做法都係聽前輩或者醫生講乜就係乜，完全無去唸點解，set個fluid rate永遠都係體重乘以3，上完堂之後先識得去考慮脫水的狀況或者潛在問題。

對於我黎講，Nerdy係一個可以令到自己成長既地方，不單是一些醫療上的知識，亦感恩都遇到很多志同道合的同行，攜手致力提高香港動物醫療水平。

最後，祝Nerdy一歲生日快樂。

希望可以在未來有更多不同的講座topic，亦都希望各位姑娘加油，勿忘初心。